Covalima (RCCT) 19-12-24-Ministeriu Administrasaun Estatal (MAE) liu husi Diresaun Nasional Simplifikasaun Administrativa no Plataforma Eletronika (DNSAPE) hala’o diseminasaun konaba Balkaun Uniku (BU) ba Autoridade sira iha Munisipiu Covalima.
Diretór Diresaun Nasional Simplifikasaun Administrativa no Plataforma Eletronika (DNSAPE), Benedito Escorial Fernandes, ba jornalista dehan liu husi sosializasaun ne’e atu fo hatene ba autoridade munisipal sira konaba servisu Balkaun Uniku ninian.
“Iha atividade ida ne’e hakarak atu husu informasaun ba iha autoridade sira, inklui servisu munisipais sira ligadu ho servisu atendimentu publiku, ita mos sei kontinua instala servisu BU nian iha autoridade Covalima, ita sei la’o uluk ho servisu tolu ne’ebé sei servisu hamutuk ho Ministeriu justisa liu husi servisu notariadu nian integra uluk servisu tolu hanesan konaba pasaporte, Billete Identidade (BI) no nos sertidaun Rejistu Kriminal no ba futuru sei integra tan servisu seluk mai iha balkaun uniku para fasilita atendimentu ba ita nia sidadaun ida ne’e maka objetivu husi atividade ne’ebé ohin loron ami hala’o iha Covalima” informa Diretór Diresaun Nasional Simplifikasaun Administrativa no Plataforma Eletronika (DNSAPE), Benedito Escorial Fernandes.
Diretór SEFOPE Munisipiu Covalima Estefanus Segundo Manek, konsidera implementa servisu Balkaun Uniku iha Covalima maka bele hakmak SEFOPE nia servisu hodi halo atendimentu.
“Hanoin ho politika governu estabelese Balkaun Uniku ne’e di’ak, tanba sistema hotu iha laran, atendimentu saida ida deit hanesan BI, pasaporte no sertidaun rejistu kriminal, exemplo ami SEFOPE mos bele inklui hotu iha laran tanba nia sistema liu husi online no bele hafasil ami nia atendimentu ba joven sira konaba hato’o evidensia, ne’ebé hau sente ho programa ida ne’e di’ak tebes no ba futuru bele fasilita mos SEFOPE hodi hala’o servisu di’ak liu tan” nia dehan.
Balkaun Uniku hanesan inovasaun importante ba prestasaun servisu publiku ba sidadaun sira, moderniza no simplifika servisu atendimentu publiku lalais no fasil, promove transparansia no boa governasaun, entertantu tema husi sosializasaun ne’e maka “Atendimentu Lalais Liu Simples no Asesivel ba Ema Hotu-Hotu”, atividade ida ne’e hala’o iha Salaun enkontru Administrasaun Munisipiu Covalima no hetan partisipasaun husi funsionariu sira ne’ebé hala’o kna’ar iha Administrasaun Munisipiu Covalima, Komandante Polisia Eskuadra Suai, inklui xefe suku sira.
Jornalista : Julio Salinas
Editor : Chamot Nahac
