Covalima (RCCT) 19-10-23–Nuno José Mesquito Pereira naran bolu “Siquito” daudaun ne’e atinji ona idade tinan 31, hanesan jerasaun foun mehi hakarak sai lideransa nune’e, nia kandidatu an ba Xefe Suku iha Matai ba periodu 2023-2030, ho misaun atu hadi’ak no halo dezenvolve ida ne’ebé inkluzivu iha suku Matai.

Nuno José Mesquito Pereira dehan bainhira povu Matai fo fiar maka ba futuru sei halo dezenvolvementu iha suku no sei kontinua programa ne’ebé xefe suku atual hala’o ona maibe la remata nune’e nia hakarak kompleta.

“Ha’u hanesan jerasaun foun ida kandidatu ba suku tanba hakarak atu hadi’a no dezenvolve duni suku ne’ebé agora daudaun Ha’u hela ba, iha motivasaun lubuk ida ne’ebé Ha’u iha tanba durante hahu kedas ukun husi ita nia tiun sira balu durante ne’e ita haree katak buat ne’ebé sira halo no buat ne’ebé agora daudaun la kontinua karik povu fo fiar Ha’u ba para atu hakotu ka kontinua buat ne’ebé sira halo liu ona Ha’u reforsa fila fali no buat ne’ebé mak durante ne’e sei dauk halo kompletu Ha’u ba atu kompleta ida ne’e” Nuno dehan.

Nia kompromete bainhira povu Matai fo fiar ba nia sai ukun sei tau prioridade liu ba bee moos no estrada ne’ebé hahu kedas okupasaun Indonezia mai to’o ukun an ida governu nunka tau atensan ba estrada iha Suku Matai laran hodi halo re-abilitasaun.

“Bainhira hetan fiar husi povu ba kaer ukun, Ha’u sei tau matan ba komunidade ninia nesesidades baziku liuliu iha Suku Mata ne’ebé durante tinan barak halerik ba bee moos no kondisaun estrada ne’ebé hahu kedas husi okupasaun Indonezia to’o mai ukun an ida ne’e sei dauk hetan reabilitasaun husi governu, tan ne’e ho esforsu tomak, hanesan jerasaun foun atu servisu hamutuk ho komunidade atu aselera lalais dezenvolvimentu iha Suku Matai” nia haktuir.

Nuno dehan preparasaun kandidatu suku la’os lao mesak maibe hamutuk ho intelektual, katuas lia na’in, joven feto no mane inklui komunidade tomak iha Suku Matai laran fo motivasaun hodi nia kandidat ba xefe suku iha ida ne’e.

“Preparasaun ba xefe suku ida ne’e Ha’u hamutuk ho komunidade liliu ba iha joven intelektuais, lia na’in katuas sira hamutuk para oinsa sra mos motiva Ha’u oinsa halo Ha’u bele kandidata ba suku tan ne’e iha loron 13 foin lalais konsege hatama duni dokumentus ba kandidatura ida ne’e, Ha’u sei lao hamutuk ho komunidade oinsa atu motiva no muda mentalidade komunidade nian no mos ba juventude hotu-hotu oinsa sira bele ativu hodi kontribui ba dezenvolvimentu iha suku ida ne’e” Nuno afirma.

Entertantu Nuno José Mesquito Pereira naran bolu “Siquito” kandidatu ba Suku Matai mai ho vizaun ida katak Ba Matai Ida Unidu, Inkluzivu no Dezenvolvimentu, ho misaun maka hanesan Hamutuk ho Komunidade Suku Matai iha Aspeitu Dezenvolvimentu Infraestrutura, Ekonomia no Sosial.

Reportazen Ekipa RCCT

Editor       : Chamot Nahac