Konsilleru Konsellu Imprensa, Benevides Correia Barros, hatete sosializasaun ba lei komunikasaun sosial no regulamentu sira ne’e hanesan atividade diariu ne’e konsakra iha planu asaun KI nian kada tinan.
“Sosializasaun lei komunikasaun sosial ho nia regulamentu sira ne’e atividades diariu Konsellu Imprensa nian ne’ebé konstempra iha planu asaun kada tinan, la’os hala’o deit iha Covalima maibe ba munisipiu tomak iha teritoriu nasional, atividades hanesan ne’e hala’o tanba atu kontinua nafatin sensibiliza no sosializa lei komunikasaun sosial ba komunidade, ba autoridade sira tantu autoridade publika hanesan administrador munisipiu, postu, ba autoridade seguransa ho nia membru tomak inklui komandante F-FDTL ho nia membru sira, ninia objetivu prinsipal atu komunidade sira liliu autoridade atu hatene konaba regras normal ne’ebé regula iha lei, liliu wainhira jornalista sira ba halo intervista ho kualker entidades sira labele subar informasaun, tanba publiku nia interese atu hatene kualker servisu ka atividades ne’ebé governu halo tantu iha nivel nasional no munisipiu.
Konselleru Benevides dehan tan “ ida seluk, importante maka kontinua nafatin atu promove liberdade expresaun no liberdade imprensa ba sidadaun tomak tanba esperitu konstituisaun hatuur klaru kedas, liberdade direitu ba imprensa ne’e direitu fundamental kada sidadaun ninian” informa Konsilleru Konsellu Imprensa Benevides Correia Barros, ba jornalista sira iha salaun Administrasaun Munisipiu Covalima Kinta ne’e.
Nia dehan, Jornalista hála’o sira nia k’nar ho livremente, no mos publiku iha dever tomak atu hetan no kestiona konaba informasaun ne’ebé Autoridade sira husi munisipiu to’o nasional partilla liu husi media sira.
“K’nar sira jornalista halo baibain ne’e livre nafatin, publiku iha dever atu hatene autoridade sira ne’ebé ukun kaer governu poder politik ho poder ekonomia ne’e ne’e iha dever atu partila informasaun ba komunidade, iha pais demokratiku ne’e direitu publiku nian, publiku tenke hatene saida maka governu halo no saida maka governu la halo, publiku iha direitu atu hatene saida autoridade sira halo iha nivel nasional ho nivel munisipiu, publiku iha direitu atu kestiona no iha direitu ” tenik nia.
Reprezentante Administrador Munisipiu Covalima Damião Amaral konsidera servisu media importante atu ajuda fahe rezultudu servisu ne’ebe autoridade sira halo nune’e komunidade mos bele hatene.
Grab
“Jornalista ne’e buat ida ne’ebé bele kolabora ho autoridade sira atu nune’e bele hadi’a no atu oinsa komunidade labele sala intendimentu ba informasaun sira, ha’u sente konsellu imprensa iha poder tomak atu kria rekejitus ka lei ruma ne’ebé iha ligasaun ho informasaun sira ne’e, atu nune’e ita hanesan autoridade fo informasaun sira ho kredivel, rezultadu serbisu ida ne’ebé maka sira halo no mos rezultadu ida ne’ebé sira fo, atu nune’e komunidade no ita nia autoridade bele dezenvolve programa sira tuir ita nia hakarak” Damião dehan
Damião husu ba entidade sira mak partisipa iha sosializasaun ne’e atu intende didi’ak materia hirak ne’ebé Konsellu Imprensa aprezenta, Damião mos husu ba partisipante sira atu fo sujestaun sira ne’ebé konstrutivu nune’e sai hanesan bukae ida ne’ebé di’ak.
“Husu ba partisipante sira atu atensaun didi’ak ba sosializasaun ida ne’ebé orsida KI atu ezerse no husu ita bo’ot sira atu fo sujestaun ne’ebé konstrutivu ba materia sira ne’ebe sei aprezenta, tanba ne’e sai hanesan mos bukae ida ba sira sai hanesan sasukat ba konsellu imprensa atu nune’e sira bele kontrola di’ak liu tan ita nia jornalista sira liliu iha covalima, iha Covalima komunidade Radio Kova Taroman iha mos media seluk maibe iha ne’e komunidade barak asesu radio Kova Taroman” nia dehan
Entertantu sosializasaun lei komunikasaun sosial ne’ebe espesifikamente iha diretu resposta no retifikasaun ba linha ministerial no governu lokal iha Munisipiu Covalima ne’e hala’o iha salaun administrasaun munisipiu Covalima.
Alende hala’o sosializasaun, Konselleru Benevides Correia Barros reprezenta Konsellu Impensa, Atribui Lisensa Meiu Komunikasaun Sosial ba Radio Komunidade Cova Taroman.
Jornalista : Julio Salinas
Editor : Chamot Nahac
