Diretóra Nasional Sentru Edukasaun Informasau no Ambiente Amenica Machado Fernandes, informa presija hametin tara bandu iha Suku Maudemu nune’e komunidade bele konserva no proteje area kosteira no oho lenuk.
“Ohin ami mai iha ne’e halo mudansa ba tara bandu, maibe ita atu hametin tan tara bandu no ami haree fila fali tara bandu iha Suku Maudemu ne’e presija tan ajustamentu ba atividades balu ne’ebé liga ho protesaun rekursu marina nian tan ne’e maka ami ajusta tan oinsa mak komunidade sira ne’e nafatin konserva, proteje lenuk no labele foti lenuk nia tolun tanba ita hatene katak lenuk nudar bioversidade ida ne’ebé komesa ona atu mohu tan ne’e ita presija atu proteje, no ita haree fila fali problema ne’ebé akontese iha area kosteira liliu bazeia ba informasaun husi komunidade Maudemu nian katak kada tinan nivel tasi ben aumenta ba beibeik tama ona ba sira nia to’os, entaun ita presija mos bandu komunidade labele tesi ai iha area kosteira tanba ai nia funsaun ita hatene alende fo mahon nia abut mos bele satan rai hodi labele tama ba tasi laran” informa Diretóra Nasional Sentru Edukasaun Informasau no Ambiente Amenica Machado Fernandes, ba jornalista sira iha Suku Maudemu.
Fatin hanesan reprezenta Administrador Munisipiu Covalima Albino Carvalho Lelo, mos saran lia konaba atividade tara bandu ida ne’e atu halulik rai hodi proteje no halo konservasaun ba area kosteira.
“Ohin ita halo atividade tara bandu ka halulik ita nia rai ida ne’e atu labele akontese tasi hadau tan ita nia fatin ne’ebé maka ita horik ba, tan ne’e lori administrador Munisipiu Covalima nia naran hakarak fo hanoin mai ita loron ohin ita halo ona tara bandu ba iha ita nia ambiente, buat hotu uluk ita nia avo sira halo tara bandu karik ita ida-idak ho lia makleat, maibe ohin loron ita halo ita nia tara bandu ho nia estrutura, ohin loron ita lansa ona tara bandu ida ne’e loron ida ita sei hasoru mos lia fuan ida makleat ba ambiental, ita nia funsionariu sira iha munisipiu hanesan mos makleat husi estadu atu bele kontrola ita nia ambiente iha ita nia munisipiu, maibe enkoraza ita jataj ita hotu-hotu iha hanoin ita hotu-hotu iha mehi atu hadi’a ita nia moris ba futuru no jerasaun, hakarak hadomi jerasaun hadi’a ambiente signifika hadomi ita nia futuru” nia dehan.
Entertantu iha atividades tara bandu ne’e katuas lia na’in sira iha Suku Maudemu oho fahi ida hodi fo han ba rai fukun ka rai lulik, iha atividades tara bandu ne’e mos parte governu liu husi ambiente bandu komuidade labele estraga no tesi ai iha area kosteira tanba oras ne’e volume tasi kontinua bo’ot hodi sesu rai maran sira no komunidade nia to’os barak iha area tasi ibun balu tasi komesa hola ona no husu komunidade labele oho lenuk no foti lenu nia tolu iha tasi tanba oras ne’e daudaun lenuk komesa mohu ba beibeik.
Jornalista : Julio Salinas
Ediror : Chamot Nahac
