Ministra Solidadriedade Sosial no Inkluzaun, Verónica das Dores, hatete durante governu liu husi ministeriu observa programa bolsa da mãe jerasaun foun ne’e ladun fo benefisiu di’ak ba labarik sira maibe bainhira inan sira ba simu tiha osan, uza fali ba sosa obralan (OB) no halo fali lia.

“Oinsa mak halo nutritivu, tanba sa mak ami ko’alia ida ne’e tanba ami hare katak inan barak simu tiha osan mos la hola hahan nutritivu fo han labarik, maibe sira simu tiha osan bele sosa tiha fali obralan, halo tiha lia, halo tiha festa, tanba ida ne’e maka ami hare, deside katak ita hapara, depois ita halo analiza estudu profunda ida atu oinsa mak ita implementa bolsa ida ne’ebé maka liliu aihan nutritivu ba labarik ne’ebé iha isin, ida ne’e maka ha’u hakarak realsa iha fatin ida ne’e” deklara Ministra Solidadriedade Sosial no Inkluzaun, Verónica das Dores, ba jornalista sira iha Sede Suku Kamanasa Tersa (26/12/2023).

Governante ne’e haktuir bolsa da mãe jerasaun foun sei remata iha loron 31 Dezembru 2023, programa ida ne’e la’os hapara tomak, maibe sei hare ba kondisaun.

“Bolsa da mãe jerasaun foun ne’e sei remata iha loron 31 Dezembru 2023, agora ita la’os hapara tomak, bolsa da mãe kondisional ne’e sei kontinua tanba tanba ne’e hare ba kondisaun ba maluk vuneravel sira, bolsa da mãe jerasaun foun ne’e ita bele hatete dehan bolsa ida ne’ebé universal,tanba ita haree ba longo prazu, ne’e fundu ne’ebé bo’ot tebes, ami analiza tiha ona katak tinan oin mai maluk parseiru sira husi Australia sei ajuda ita maibe iha primeiru ano 2022, 2023 to’o 2024 ne’e ita mak hela ba pursentu 18, atu tama ba 2025 ne’e kuaze ita bele hatete katak ita sei gastu osamentu ida ke bo’ot ba bolsa ida ne’e” nia dehan.

Entertantu Ministra Solidadriedade Sosial no Inkluzaun, Verónica das Dores dehan razaun ministeriu hapara programa bolsa da mãe jerasaun foun tanba durante ne’e observa nota katak inan sira bainhira ba simu osan la sosa aihan ne’ebé nutritivu fo han oan sira maibe utiliza fali osan refere ba sosa obralan no lori ba lia.

Jornalista : Julio Salinas

Editor       : Chamot Nahac