.png)
Covalima (RCCT) 30-01-24
-Tuir Xefe Delegasaun Teritorial Floresta Munisipiu Covalima, Domingos Gusmão, hatete kuandu komunidade ida ne’ebé maka naran tesi ai no kasa balada fuik sira arbiru ne’e kontra ona lei no ne’e krime.Xefe Delegasaun Teritorial Floresta Munisipiu Covalima, Domingos Gusmão dehan floresta iha regras wainrira komunidade ida atu tesi ai tenke iha lisensa, kuandu laiha lisensa maka la naran tesi ai arbiru maka ne’e krime.
“Ita iha regras kuandu atu tesi ai nia prosedur ne’e iha, ne’ebé komunidade balu tesi ai la tuir regras ida ne’e krime, regras ne’e halo lisensa husi xefe suku mai diresaun Floresta munisipiu, bazeia ba karta husi xefe suku maka ami mos bele hasai lisensa tesi ida ne’e maka durante ne’e ami hala’o, kuandu sira tesi ai ilegal maka ami halo patrulamentu rutina hetan ami bele kaptura sira tanba laiha lisensa husi Floresta munisipiu, ita iha regras ne’ebé estabelese iha tempu UNTAET nian mos regras iha ona, tanba ne’e komunidade balu maka tesi no sunu ai arbiru inklui kasa animal fuik sira ita bele kondena sira tuir lei ne’ebe iha” Xefe Delegasaun Teritorial Floresta Munisipiu Covalima, Domingos Gusmão, dehan ba RCCT iha nia k’nar fatin Floresta Munisipiu Covalima Segunda (29/01).
Nia afirma durante ne’e parte Floresta Covalima halo sosializasaun beibeik ba komunidade sira konaba servisu floresta nian oinsa atu labele tesi ai no oho balada fuik arbiru.
“Durante ne’e ami halo sosializasaun ba ita nia inan aman sira iha baze liliu kona ba servisu floresta nian liliu ba halo mevel no ba sira ne’ebé tesi ai no sunu ne’e ami halo sosializa foin lalais ne’e ami halo sosializasaun ba suku 10, iha sosializasaun ne’e mos atu hato’o informasaun ba komunidade sira kona ba uza armas hanesan kilat manu (Sanapan) tenke sira kuidade labele uza arbiru, motor sera (sensor) mos hanesan labele uza arbiru karik, kilat manu ita labele uza maibe ba motor sera tenke iha lisensa ida ne’e ami halo sosializasaun husi suku ba suku” nia dehan.
Xefe Delegasaun Teritorial Floresta Munisipiu Covalima, Domingos Gusmão ne’e dehan Floresta iha lei numeru 5 kona ba armas brankas ne’e iha ona kuandu komunidade kontinua halo Floresta sei kondena sira tuir lei ne’ebé iha hodi halo sosializasaun ona ba sira durante ne’e.
Editor : Chamot Nahac
