Komando Polisia Nasional Timor-Leste (PNTL) iha Munisipiu Covalima, iha loron 26 fulan Febreiru 2024 hale’u oras tuku 8 kalan kapturasaun kedas ba sidadaun na’in rua ne’ebé mai husi Munisipiu Dili, hafoin hatama fahi husi Malaka NTT Indonesia mai Covalima liu husi dalan ilegal iha area tasi ibun Aldeia Wetaba, Suku Beiseuk, Postu Administrativu Tilomar.
“Iha dia 26 de Fevereiru 2024 oras tuku 8 kalan iha area eskuadra Tilomar, Aldeia Wetaba ita kaptura sidadaun na’in 2 ne’ebé mai husi Munisipiu Dili tama ilegal ba iha Malaka lori hela fahi oan hamutuk 25, animal sira ne’e mai husi Kabupaten Malaka, Indonezia, sira atraves liu husi tasi hatun tiha fahi sira iha tasi ibun Wetaba lori tama mai iha Aldeia Wetaba depois ita konsege kaer, iha kalan ne’e kedas ita lori sira mai iha komando hodi halo identifikasaun, iha informasaun ne’e deteta duni sira lori duni fahi sira ne’e husi Indonezia mai ne’ebé nia prosesu ne’e agora ohin dadersan hato’o ona ba Ministeriu Publiku, no parte Ministeriu Publiku informa mai halo formasaun ba iha sumariu depois ho lalais para atu hetan rezultadu liu husi prosesu ida ne’e tanba animal ne’e la hanesan sasan sira bevidas ne’ebé ami bele rai iha ami nia fatin ou bele ba rai iha ministeriu mais ida ne’e agora animal ami laiha kondisoens para atu bele sulan animal no fo han hodi hein prosesu” informa Komandante Polisia Nasional Timor-Leste (PNTL) Munisipiu Covalima Superientedente Polisia Calisto Gonzaga, ba jornalista sira iha nia knar fatin Komando PNTL Munisipiu Covalima Kuarta (28/02).
Superientedente Polisia Calisto Gonzaga, esplika sidadaun na’in rua ne’e moris iha Maliana, Munisipiu Bobonaro, no ba buka moris hodi hela metin iha Munisipiu Dili ikus mai hodi hala’o atividades ilegal hodi hatama fahi husi Malaka NTT Indonesia mai Timor Leste liu husi fronteira trester entre Covalima ho Malaka ikus mai polisia kaptura.
“Sira mori iha Maliana, Munisipiu Bobonaro maibe sira hele iha Munisipiu Dili, Tasi Tolu sira hanesan ema negosiu sira mai Covalima iha Sesta (23/02) feira depois sira liu ba iha Wetaba depois sira hakatak liu ba fronteira tama ba iha Malaka buka hela fahi oan sira ne’e sosa hodi tama mai, intensaun kareta ne’ebé tula fahi bainhira fahi ne’e tama ona mai Wetaba foin sira kontaktu ba ba kareta na’in husi Dili mai Suai atu lori tula fahi ba ba Dili, kareta ne’e aluger no fin ita deteta hetan kaptura kareta ho fahi oan 25 ne’e, fahi ida ne’e modelu makao maibe ho lian Indonezia dehan babi pedaging” haktuir Komandante PNTL Covalima.
Entertantu oras ne’e daudaun kareta ho marka Grand Max ho nia numeru polisia (Plat) A. 22.458 tula fahi oan ne’ebé sidadaun na’in 2 hatama husi Malaka mai Munisipiu Covalima liu dalan ilegal area tasi ibun Wetaba oras ne’e asegura ona iha Komando PNTL Munisipiu Covalima hodi hein prosesu investigasaun.
Jornalista : Julio Salinas
Editor : Chamot Nahac
