Covalima (RCCT) 20-05-24-Prezidente Autoridade Munisipiu (PAM) Covalima, Miguel Armanda Cardoso (Razão), hatete loron 20 fulan Maiu Sai hanesan loron espesial ba povu Timor-Leste tomak espesial povu Covalima basa molok hetan Badeira nasional rasik sei selu ho ema rihun resin nia vida hafoin alkasan vitoria ba ukun an.
Prezidente Autoridade ne’e relata, atividade hotu iha ambito no mos serimonia isar da bandeira nasional ba komemorasaun loron restaurasaun independensia ba XXII la’o ho susesu tanba hetan partisipasaun masimu husi Komunidade no entidades tomak iha Covalima.
“Ohin ita komemora loron restaurasaun independensia 20 de maiu ba dala 22 iha Munisipiu Covalima, loron ida ne’e espesial tebes ba ita hotu Timor-Leste, tanba ida ne’e maka ohin loron ita realiza hamutuk ho ita komandante polisia, F-FDTL, sekretariu munisipal na’in-3 Diretór munisipal sira, Administrador Postu Administrativu Suai, xefe suku, xefe aldeia no komunidade tomak husi suku 5, nune’e mos mai husi sosiedade sivil, hodi hanoin hikas loron espesial ida ne’e, nune’e mos durante nia lalaok la’o ho di’ak, tanba iha selebreasaun ida ne’e la’o ita anima komunidade sira ho atividade desportu modernu no desportu tradisioanis sira maka ohin ita hotu ba akompaña liu ona hanesan sa’e bua, tata berlidus no dada tali, antes ne’e mos iha desportu moderna hanesan maratona, Futeboll, volly boll no basket boll iha ita nia munisipiu ida ne’e la’o semana ida nia laran, lao ho di’ak” dehan Prezidente Autoridade Munisipiu (PAM) Covalima, Miguel Armanda Cardoso ba Jornalista hafoin remata serimonia isar bandeira Nasional ba selebrasaun loron restaurasaun independensia 20 de Maiu ba dala 22 iha kampu Futebol Ladi, Kamanasa, Segunda (20/05).
Nune’e PAM Covalima, Miguel Armanda Cardoso (Razão) husu ema hotu fo kontribuisaun no tau importansia ba loron nasional sira basa, liu husi dedikasaun no luta lubuk ida mak foin dekreta loron nasional ida ba nasaun independensia.
“Iha biban ida ne’e PAM nudar prezidente autoridade hakarak fo mensajem ba komunidade tomak liliu ba nai Veteranu no Veterana sira atu fo kolaborasaun tanba loron hirak hanesan ne’e loron espesial tebes, husu ba sira hotu katak obra hirak ne’ebe hahu husi inisiu mai to’o ohin loron maske la’o neneik maibe iha ona mudansa ba dezenvolvimentu tan ne’e komunidade, entidades sira seluk sosiedade, parte igreja juventude sira, Veteranu sira PAM nafatin hato’o mensajem ba sira atu tau interese ba loron espesial hanesan ne’e” dehan PAM.
Entertantu iha selebrasaun loron restaurasaun independensia 20 de Maiu 2024 ba dala 24 ne’e iha Munisipiu Covalima la’o ho di’ak tanba hetan partisipasaun husi entidade hotu hanesan veteranu, Veterana, parte igreja sosiedade sivil inklui povu tomak husi suku 5, maka hanesan komunidade husi suku Beko, Debos, Kamanasa Labarai no Suai-Loro.
Jornalista : Julio Salinas
Editor : Chamot Nahac
