Covalima (RCCT) 02-02-24-Enerjia Eletrisidade Timor-Leste-Empreza Publiku (EDT-EP) Munisipiu Covalima rekolla koima hodi hatama ba kaixa jeral estadu iha tinan 2023 ho montante dolares Amerikanu Rihun atus lima sia nulu resin walu, atus walu sia nulu resin lima, sentavus rua ($ 598.895,02.).
Relata Xefe Unidade EDTL-EP Munisipiu Covalima, Anorito Mendonça ba Radio Comunidade Cova Taroman iha nia knar fatin, Kinta (01/02).
“Hakarak atu hatete deit kona ba reseitas 2023 nian hahu husi fulan Janeiru to’o Dezembru ne’e ita konsege rekolla osan ho montante osan hamutuk dolar Amerika rihun atus lima sia nulu resin ualu, atus ualu sia nulu resin lima sentavu rua ($ 598.895,02), ne’e total reseitas Munisipiu Covalima nian ba tinan ida nia laran” informa Xefe Unidade Enerjia Eletrisidade Munisipiu Covalima, Anorito Mendonca ba jornalista RCCT iha nia kna’ar fatin Suai Kinta (01/02).
Nia afirma durante tinan tomak ida nia laran EDTL-EP rekolla reseitas ne’e mai husi nova ligasaun, utilizasaun lina husi indutria, komunidade konsumedor eletrisiade uza prepagu inklui komersiante hanesan loja bo’ot sira.
“Orsamentu ne’ebé parte EDTL Covalima rekolla mai nova ligasaun no husi ita nia emprezariu sira hanesan parte komersial hanesan loja sira, depois hanesan ita nia industria bo’ot sira ejiste iha Covalima hanesan Covec ho sira ne’e hotu maka ita bele hetan orsamentu ho montante ida bo’ot hanesan ne’e inklui mos kliente sira ne’ebé uza ona prepagu” nia dehan.
Entretantu liu husi esforsu ne’ebe funsionariu sira nian maka EDTL-EP Covalima foin bele rekolla osan ho total dolar Amerika rihun atus lima sia nulu resin ualu, atus ualu sia nulu resin lima sentavus rua ($ 598.895,02), hodu hatama kofre estadu iha tinan 2023 ne’e.
Jornalista : Julio Salinas
Editor : Chamot Nahac
